1Cor 5 | KZE | STEP | keinárawapinkemba moóráwai anómba sáwíꞋa éna avowán-awaininkomba mairáiye sewaꞋá ísaraumne. keinárawaꞋa Áánútun-aaiyaveꞋa áraire kwésewai mirá-sáwíꞋó kwéiwaintaveꞋa étuwaao íma sewaná úwoi mirá kwéimbanivo Áánútuna aambó ímo kwégwaraawai íma mirá kwéesa mirámó kwéowaiyavesa sáwí-meyamba mayánááowe kwésewe.

1 Corinthians 5

avowán-awaininkomba mairáin-kwasai.

1 keinárawapinkemba moóráwai anómba sáwíꞋa éna avowán-awaininkomba mairáiye sewaꞋá ísaraumne. keinárawaꞋa Áánútun-aaiyaveꞋa áraire kwésewai mirá-sáwíꞋó kwéiwaintaveꞋa étuwaao íma sewaná úwoi mirá kwéimbanivo Áánútuna aambó ímo kwégwaraawai íma mirá kwéesa mirámó kwéowaiyavesa sáwí-meyamba mayánááowe kwésewe. 2 keinárawapimba moóráwai ména anó-sawiꞋa kwéisaꞋa kaweꞋá umáíya máyaumne kampaꞋá kwéseꞋa kentúma maé kwéiyovo sáwíꞋa uráin-kwaasiyavena kentirunkómó umbaimó táínaꞋa minkwáásí aiꞋmátuwaaro. 3 kemó kentópaꞋo komékai minánó-sáwíꞋó uráiwaimba aaivimbá mayankéꞋa sáwíꞋa kwéone súsina. kemá némpaꞋa méꞋa kesí imáyáao kentópaꞋa kwáyáísaꞋa misáwíꞋó uráiwaimba áꞋa aaivimbá mayánkaraumne. 4 torupamáímo maíyampimba kesí imáyáao kentópaꞋa kwáyainana Ísóigo Ísuna asirayámbá keinárawate kwáyáintaveꞋa misáwíꞋó uráiwaimba aaivimbá mayánkáaro. 5 Áánútuna kwaási kárákwiraampinkemba aiꞋmátuwenana Sáátáánigo umbai-yántááꞋá amínana sáwí-amba tuwáinana Ísóigo Ísumo kumíndaraꞋa kwembá airáníntaveꞋa mirá éꞋa aaivimbá mayankéꞋa aúwáaro.

6 kaweꞋá umáíya máyaumne kwéseꞋa makáawanamo moórá-kisaamo kampindénamo imbá amápa-kisaavaꞋo kóyáwé intembá keinárawapimba moóráwai miráumai sáwíꞋo índawai keinárawapimba tivó séꞋa aiꞋmátuwaaro. 7 tíyótaasa-tanon-kanaa tóyo ésa Yútaa-kwaasi toómbó intóráín-tantaaꞋa tuwésa aúná-tomba marésa sipisípi-araaꞋa tuvúꞋmái kwénaawe. miráumai Ísu Káráísiti kentááyáváíyé séna pukáimba póꞋa aúnáiꞋa umái méꞋa mindáyaveꞋa misáwíꞋó uráimba kwétuweꞋa kaweꞋá umái máéro. 8 sáwíꞋo kwéone sáwí-yantaatavaiye íma aamoí éꞋa kawe-tántáátáváíyé árair-aintavaiye suꞋmai aamoí oró.

9 ááéma moórá-auvai agaimái simátimeꞋa séꞋa aarai-úmóyáné kwaai-úmóyáné kwéowaise íma máéro siráunda 10 mináímbó siráunda Áánútuna kwaásivinkembo mirámó kwéowaise íma máéro siráumne. ÁánútunopaꞋo ímo tiráan-kwaasi aarai-úmóyáné kwaai-úmóyáné óꞋon-oꞋon-tantaar-umoyane túran-andawe ésa marapá-tántáátávésa aamoí ésa íma Áánútuntavesa aamoí ésa mirámó kwéon-kwaasiyaveꞋa íma séꞋa Áánútuna kwaásivakewaimo mirámó iíyávéꞋa siráumne. ÁánútunopaꞋo ímo tiráan-kwaasi amápaꞋ-maravaꞋo máyáamba íma tiyuwéꞋa miwísé úwoi máéro. 11 ánivo agaimakáunda-ainkona ááimba maarán-áímbán-iye. moóráwai Áánútuna kwaási úne kwésiwai aarai-úmóyáné óꞋon-oꞋon-tantaar-umoyane aúran-andawe éna marapá-tántáátávéna aamoí éna Áánútuntavena íma aamoí éna simái túwíꞋa sáwíꞋo umátinkena uwoꞋaóꞋ-nómbá néna uwoꞋaóꞋá kwéiwaise íma méꞋa kwesé íma toómbá naaró. agaimakáunda-ainkona ááimba mirán-áíntávéꞋa siráundawe.

12 ímo ÁánútunopaꞋo tiráawai kemá íma aaivimbá maitinkánaumpo Áánútu aaivimbó maitinkánímba mindá kwendéímán-iye. keinárawapinkemba Áánútuna kwaási sáwíꞋo uráawai aaivimbá maitínkáaro. keinárawapinkemba moóráwai misáwíꞋó uráindawaimba aiꞋmátuwaaro.